Սեպտեմբերի 28-ին Արևելյան դպրոցի երրորդ դասարանցիները մեկնեցին Լուսագյուղ, հաղթահարելու Թուխ Մանուկ տանող բարձունքը: Մինչ ճանապարհ ընկնելը սովորողները ուսումնասիրել էին քարտեզը, պարզել էին, թե ինչ եղանակ է լինելու, իրենց ճամփորդական հանդերձանքի ու ճամփորդական ուսապարկի պարունակության, ինչպես նաև ճամփորդական կանոնների մասին պատմել էին իրենց անհատական բլոգներում հրապարակված տեսանյութերում:
Ճանապարհը տևեց մեկ ժամից ավելի: Էդմոնը գուգլ քարտեզով հետևում էր ճանապարհին և պարբերաբար հայտնում էր, թե հիմա որտեղ ենք, ո՞ր փողոցում, ո՞ր քաղաքում կամ գյուղում, ո՞ր մարզում: Իսկական ուրախ ավտոբուս էր՝ երգով ու լռության խաղով լի:
Ճամփորդական ֆոտոպատում # 1. Ճանապարհին
Տեղ հասնելուն պես սովորողները նախաճաշեցին: Նախաճաշից հետո հավաքեցին աղբը:
Ճամփորդական ֆոտոպատում # 2. Նախաճաշ բացատում
Նախաճաշից հետո ճանապարհ ընկանք դեպի Թուխ Մանուկ Վերի վանք, որը 6-7-րդ դարերի կառույց է:
Ճամփորդական ֆոտոպատում # 3. Բարձունքի հաղթահարում
Եկեղեցու բակում սովորողները հանգստացան, որից հետո որպես անկախության խորհրդանիշ ծածանեցինք եռագույն դրոշը, լուսանկարվեցինք:
Եկեղեցում երգեցինք «Հայր մեր», միասին տերունական աղոթք կարդացինք, մոմ վառեցինք:
Ճամփորդական ֆոտոպատում # 4. Թուխ Մանուկ վանքում
Վերադարձանք: Հանգստացանք: Սովորողների մի մեծ խումբ ճամփորդության ողջ ընթացքում «հետապնդեց» բացատի մորեխներին ու ճանապարհի մողեսներին: Իսկ մեր նորեկ Հայկը անընդհատ օձ էր փնտրում, նույնիսկ մի անգամ փորձ արեց քարը շրջել, որ օձին դուրս բերի: Բնության գրկում խաղացին ու վազվզեցին՝ վայելելով գեղեցիկ բնությունն ու մաքուր օդը: Երբ խաղերից անցում արեցին փայտերին՝ հասկացա, որ «վայրի ցեղերը» վերադառնում են: Ճիշտ ժամանակն է Երևան վերադառնալու: Ճամփորդական փորձություններ էլ պատահեցին. կանոնները խախտելու պատճառով Հայկը վազեց ու ընկավ, իսկ Աշոտն էլ կորցրեց իր հեռախոսը:
Ճամփորդական ֆոտոպատում # 5. Բացատում
Ճամփորդության մասին սովորողների պատումները կհրապարակվեն իրենց անհատական բլոգներում: